政壇：謝偉俊衫鞋 同款幾隻色
香港貿易發展局早前舉辦時裝節交流酒會，立法會議員謝偉俊（Paul）當日都有出席同其他嘉賓交換衣着心得，期間Paul以佢當日所穿嘅一對鞋為例，話試過同一款式嘅鞋買齊黑色、紅色等四隻顏色；當問及係咪四隻顏色嘅鞋都會着出街，佢笑言通常最後着嚟着去都係同一隻色嘅鞋。
謝偉俊同一款式嘅鞋買咗四隻顏色。
Paul過去出席立法會都精心打扮，佢自言以前買落好多衫，尤其初出嚟社會工作時，唔少人都係先敬羅衣後敬人，搞到佢依家啲衫多到要搵個二千呎嘅倉先夠地方擺。但佢強調儲落咁多衫唔係因為鍾意追新款，而係諗住難得搵到款式同剪裁啱自己身形嘅鞋履，會一次過買齊幾隻色喎。
