政壇：楊全盛狂轟莫乃光拉布
立法會選舉在即，無論直選抑或功能界別選舉都開始傳出陣陣火藥味，資訊科技界別現任議員莫乃光更因近年嘅表現，遭業界狠批，佢喺多項議題嘅立場或被指模糊，或被指轉軚，有業界中人質疑佢冇同業界站在同一陣線，包括政府提出設立創新及科技局，以及最終「作罷」嘅版權修訂條例草案。盛傳會出戰資訊科技界嘅楊全盛（Eric）直指莫代表唔到業界。戰事真係一觸即發！
其實，去年創科局開局一事，科技界已聯署批評莫乃光冇支持財委會加開會議，叫佢認真反省；至版權修訂條例草案時，莫又喺網民嘅壓力下，由支持轉為反對，其後喺草案即將「作罷」前，才提出新建議，但版權例仍難逃一死。
結果，莫梗係走唔甩畀業界猛轟，但原來危機仲未過，依家立法會財委會屢遇拉布，Eric指如果財委會未能喺四月一日前通過相關撥款，二千多名同政府簽訂臨時合約嘅業界人士就會「冇糧出」，當中涉及金額過億元，指莫既代表唔到業界，又唔覺得佢為好多業界做事，仲話若姑息喺立會拉布嘅人，亦等同拉布。
成立聯盟初見人脈
至於立會代表係咪需要換人，Eric就話「今年九月，拭目以待啦！」
問Eric係咪換人嘅人選呢，佢話「今日」（即尋日）暫時未考慮係咪參選，佢尋日成立智慧城市聯盟，但強調聯盟同選舉絕對無關，只係想幫香港發展智慧城市。出席成立典禮嘅有創科局副局長鍾偉強、發展局副局長馬紹祥，以及三任互聯網專業協會會長葛珮帆、洪為民、鄧淑明等，人脈已見。
