鉛水風波搞到滿城風雨，甚至變成一場政治風波，最離譜嘅係，有高官唔好好反省，反而發老脾大呻「官到無求膽自大」。梗係啦，港產官僚逼市民日日飲鉛水，真係唔慌唔膽大包天咯。

事件鬧足大半年，當局先後成立三個委員會調查，其中食水含鉛超標調查委員會足足查咗四個月，今日將開展結案陳詞，房屋署及水務署兩大部門自然係當紅炸子雞，喺聆訊中成為眾矢之的。正如有水專家話齋，鉛水事件中整體政府都有錯，部門無溝通、欠專業又官僚，唔改革只有死路一條。

當中以房委會被人插得最勁，數出四大罪狀。而房署作為公屋大業主，喺物料審批程序中全部漏招，導致大批訂購含鉛錫條接駁食水喉，簡直係罪無可恕。至於水務署嘅罪狀都唔少，睇吓水務署署長林天星居然對水質科學半桶水，就知佢幾廢喇。

老實講，其實使乜調查吖，鉛水風波之所以咁大鑊，冇可能只係水喉工人技術欠佳，或者個別環節出問題，擺到明係部門監管甩甩漏漏，搞到一條龍式出錯啦。最弊係，港產官僚出錯，最後咪又係納稅人埋單，你話係咪冤枉吖。

即係咁，鉛水事件爆發至今，多個部門已使咗一億零八百五十萬元公帑，單係房委會就用咗六千萬派發樽裝水，名副其實倒水咁倒。小數怕長計，依家就話燒一億啫，之後仲有大把手尾跟，其他唔講嘞，下年度就要用一千七百多萬元開設三十六個公務員職位驗水及視察，可想而知，仲未知要幾多個億至埋到尾呀。

納稅人嘅錢不花白不花，反正今次大家都睇咗場好精彩嘅球賽，唔講真係唔知，港產官僚最叻係將個波交來交去。好似房署明明冇做好物料把關工作，居然卸膊話水質唔係佢管，水署先係專業咁話，認真好波。而水務署亦唔係省油嘅燈，一個大腳回傳去房署、持牌水喉匠及承建商身上，唔止冇承認過責任，喺改善制度上亦無具體承擔，直頭要畀紅牌罰離場啦。

話時話，出咗咁大單嘢，到底有邊啲官僚要人頭落地呢？嗱，調查委員會預料最快五月呈交報告，話就話要揪出真正「鉛兇」啫，但你知啦，呢類乜乜物物調查報告，有邊次唔係高高舉起，輕輕放下吖，最多咪推出補鑊措施就算數。今次政府又玩乜把戲，大家金睛火眼望實嘞，叮！