城中鏡：相睇結良緣
早前仁濟醫院舉行周年慈善餐舞會，為各項服務基金籌募經費，數百名城中政商名人聚首一堂。今年仁濟董事局喜事連連，繼總理羅穎怡喺年初出嫁之後，四月底就輪到紀惠集團行政總裁湯文亮嘅女兒、總理Jacqueline湯振玲同男友Charles擺酒結婚。喜上眉梢嘅Jacqueline自爆，同Charles係長輩安排相睇認識，結果搵到一段好姻緣，所以勸喻城中恨嫁姊妹唔好抗拒相睇喎。
湯振玲（左）同Charles相睇而認識。
伍步功（左）同廖漢輝（右）現身支持陳李詠詩。
林煒珊（左）同鄭承峰聯手將餐舞會搞得有聲有色。
「釣友」伍步功 嘗鮮有要求
今次係Jacqueline第一次相睇，由於係長輩介紹，所以令佢好放心赴約。佢就笑笑口話，當時連埋雙方長輩共有六人，兩位當事人忙住同對方長輩傾偈，反而冇乜交流，仲因為座位安排問題而睇唔到對方，後來約出嚟飲咖啡，先至擦出愛的火花。
當晚舞會，仁濟主席林煒珊、副主席兼餐舞會籌委會主席鄭承峰等董事局成員齊出動招呼賓客。永隆銀行後人兼順德聯誼總會副主席伍步功、南區前區議員廖漢輝都有到場支持同為順德人嘅總理陳李詠詩。
伍步功依家逐漸卸晒公職，享受退休生活，閒時經常到西貢海釣，有時獨自一人由朝早六時釣到天黑都唔覺悶。釣魚幾十年，最威水一次係喺墨西哥灣釣到一條重達二百一十磅嘅劍魚。以為伍步功咁鍾意釣魚，實好鍾意食魚，咁就錯喇，佢自言食魚好揀擇，釣到嘅魚獲，多數送畀朋友食喎。
