區鎮樺嘅辦事處電話號碼被寫到公廁門上，變成召妓熱線。（資料圖片）
區議員主力服務居民，為咗方便街坊，通常都會公開個人同辦事處電話號碼，但亦因此經常招惹奇怪來電。白鴿黨大埔區議員區鎮樺就大呻辦事處電話畀人寫喺一間公廁，當成色情召妓熱線，惹嚟唔少中年男士來電，嚇壞平日負責接街坊電話嘅辦事處年輕女職員。
區鎮樺話其辦事處近幾個月開始，經常收到一啲男士來電，聽聲音似係中年男士，呢啲男士多數一聽到係議員辦事處就即刻收線，情況非常詭異。為咗解決問題，佢哋曾經嘗試同來電者交談，一問之下先發現，原來辦事處電話畀人寫喺深水埗一間公廁嘅門上，表明係召妓熱線，真係大整蠱。
雖然佢哋已經即時搵人去清理公廁門上面嘅電話號碼，亦都向警方備案，但事件仍未平息，似乎係有人又再寫過。區鎮樺話除非搵人二十四小時守住個廁所門，否則無法解決，但又太浪費人力物力喇，惟有繼續接聽呢啲電話。莫非佢得罪人多？佢就話地區工作本來就會得罪好多人，但佢無有怕，只係難為一班聽電話嘅職員。
第一手消息請下載on.cc東網
