商務及經濟發展局局長Greg蘇錦樑出名「有威就自己攞，有鑊就下屬孭」，本月初佢提早宣布《二○一四年版權（修訂）條例草案》作罷後，官場最近就傳出有「第一滴血」，Greg蘇要換新聞秘書。
屢揭與下屬不咬弦
喺Greg蘇近五年嘅任期內，由前局長劉吳惠蘭過渡嘅Grace吳綺媚算係同佢最夾，足足合作咗三年幾。直至一四年十月，因為Grace升任新聞處助理處長，於是由Winnie杜婉冰接替。本報舊年都曾經披露Winnie同佢不咬弦，合作唔夠五個月，雙方都要求換人，舊年四月就由現時嘅Connie文惠玲頂上。
Connie接任近一年，據聞將喺四月底至五月初離開，同發展局總新聞主任Flora盧鴻對調。據悉Greg蘇一直都指同Connie夾唔嚟，故要求換人，個個都夾唔嚟，其實最應該要走嘅人係咪Greg蘇本人呢？
本來舊年十一月創新及科技局創局，新聞處都有問過Connie有冇興趣過檔，但佢冇接受。現時同Flora對調，一來職位係平調，二來同佢之前做房屋署一樣，去到發展局都係負責局內新聞，毋須跟局長出入各大小場合，可能呢樣就係佢願意調位嘅原因。
至於Flora，其實佢之前都做過商經局，仲跟過時任副局長嘅Greg蘇。雖然兩人共事過，但觀乎Greg蘇喺免費電視發牌、處理水貨客、版權修訂條例等風波都搞到一鑊粥，唔知Flora能否改變呢個「三煞位」嘅命運呢？
第一手消息請下載on.cc東網
