喺facebook（fb）新增「嬲嬲」功能後，政界中人要面對真正嘅民意，隨時會鬧出國際笑話，正如特首梁振英嘅fb招來勁多人嬲，搞到外國傳媒都報道。估唔到呢個時勢，創新及科技局仍然打算開fb，認真勇氣可嘉！創科局副局長David鍾偉強尋日到立法會資訊科技及廣播事務委員會開會，上任後首次見傳媒，仲透露局方呢個諗法，叫大家拭目以待，「希望唔好嬲我啦」！
知道最新有得撳嬲嬲，就知David玩咗fb好耐嘞！佢仲叫人記得add佢私人fb，呢啲咪係開誠布公囉！佢又話自己以往好彩，成家人玩fb都未中過毒link，但「好似打麻雀咁，唔好話自己叻，否則就會輸錢」。
David為官都好夠運，一上任就遇到局長楊偉雄上京，要即時做署任局長，原來佢都係上任後先知，雖然當日好忙，但亦平安度過，佢笑指自己得年幾任期，早啲做好過遲啲做啦！仲話咁都幾好，咁快就經歷咗好多人要數個月才有機會嘅經歷，至於下屆仲會唔會留低，就叫大家遲啲先問佢喇！
做足準備迎拉布
上任未夠半個月，當然要關心吓佢嘅壓力大唔大啦，佢就講笑話之前做數碼港壓力更大，依家最大嘅分別只係要早啲返工，但係就冇收工時間。咁驚不驚尋日開會有人拉布呢？佢話「吓，咁都拉布？唔會吓話，又唔係問（攞）錢」如果拉布，就會努力做好準備囉！睇番佢喺會上嘅表現，除咗開場發言，只有兩次回答議員問題，但會後就強調自己「好熟書」，但作為副局長，只係負責答政策範疇。
至於上任一個多月嘅政助Sandra梁淑寶亦有陪同David到立會，佢話自己未來會專責社交媒體以及同議員聯絡。睇嚟fb係由Sandra做主力。佢又透露，自己喜歡跑步，讀初中嘅兩名子女都盡得其真傳，課餘學田徑，但佢陪仔女跑時就會偷懶，叫佢哋先跑，自己就會聲稱先做熱身，其後先跑。
第一手消息請下載on.cc東網
