《K歌之王》唱到街知巷聞，係人都知K歌至強非「E神」莫屬啦，不過咁，大家又知唔知邊個係「K仔之王」呢？仲使講，梗係江湖上人稱「上海K仔」嘅「上海仔」啦。

講起和勝和前坐館「上海仔」郭永鴻，係人都知佢組織假難民僱傭兵團，作奸犯科，無惡不作，搞到香港雞犬不寧。其實佢點止係「南亞兵團之父」吖，佢以「養雀仔」方式招攬本地少年販毒兵團，荼毒青少年，實行無毒不丈夫，就更加得人驚嘞。

呢嗱，最近警方查獲多名有和勝和背景嘅青少年販毒案，起出市值八十萬元嘅「Ｋ仔」，其中一名男童年僅十四歲，毛都未生齊已經淪為販毒童工，可謂「K仔出少年」，話唔定日後可以接上海仔班。

話口未完，警方又拘捕一名和勝和分子，涉及近月深水埗多宗摧花案。據講有人十五歲加入黑幫，廿歲開始吸冰毒，吸到唔人唔鬼，周不時襲擊少女洩憤，仲話「打完舒暢啲」，證明吸毒唔止影響青少年心智同健康，仲會引發其他罪案，問你怕未。

冰凍三尺，非一日之寒，上海仔涉及嘅不法勾當成十幾本電話簿咁厚，近年仲愈趨高調，夠膽公然晒馬，完全當警察冇到，點解過往當局一直視而不見，見而不理，好似天下太平咁，依家忽然又大發神威連環掃蕩咁奇嘅呢？

好簡單，冇檳榔o趙 唔出汁，事出必有因。「上海仔」之所以一直受關照保太平，咪因為有人充當保護傘，罩住佢咯。遠嘅唔講，本報早前獨家踢爆上海仔與本港退休高級警司王福林合夥撈世界，涉嫌喺澳門偷錢及串謀訛騙，可見佢有恃無恐，你話當中冇人通風報信，冇人狼狽為奸，包庇不法勾當，真係搵鬼信啦。

樹大有枯枝，族大有乞兒。事實上，「上海仔」一向同警察中嘅敗類勾勾搭搭，不排除仲有唔少比王福林退休前高幾班嘅極高級警務人員同佢分屬「友好」，點止係一條褲兩份着吖，簡直一條褲成棚人着，呢把無法無天嘅保護傘，想唔硬淨都幾難啦。

學似有學者話齋，警隊高層喺「新人事、新作風」下，開始撥亂反正打擊涉及和勝和嘅販毒案件，總算係遲到好過冇到。當然喇，打蛇七寸，擒賊擒王，淨係拉幾個少年毒販係冇用嘅，繼續有法不依，「Ｋ仔之王」容乜易將香港變成「Ｋ仔之都」㗎，叮！