城中鏡：亞視小狂迷
亞洲電視長達五十九年嘅廣播歲月快將走到盡頭，一批亞視、亞視前身嘅麗的電視迷萬分感慨，包括「星之子」陳易希師弟、年僅十八歲嘅李鍵邦，佢喺五、六年前成為亞視迷，曾渴望走入亞視節目部工作，而短短三年間共收藏約二百本《電視週刊》、約十多張黑膠唱片、約三百盒錄影帶等，佢盼望亞視舊片庫可得以保存，又計劃喺五、六月舉辦麗的收藏品展覽，讓一眾粉絲一同緬懷過去。
李鍵邦係亞視、麗的電視迷，計劃喺稍後舉辦收藏物品展覽。
八十年代出版嘅《電視週刊》係李鍵邦個人最愛收藏品。
李鍵邦認識多名麗的藝人，並收集佢哋嘅簽名留念。
李鍵邦舊年聯同另一人創出「自潔門柄」揚威國際。佢最愛嘅電視年代，係自己仍未出生嘅麗的電視年代。佢憶述，過去認為亞視「無乜嘢睇」，有一次喺亞視台慶節目聽到數首麗的電視劇集歌曲後，自此迷上麗的同亞視嘅一切，不停重看有關電視劇同翻聽有關劇集歌曲，仲喺社交網站開設名為《美好的年代－RTV 麗的電視》分享收藏物品。
最愛《電視週刊》
佢對麗的同亞視嘅鍾愛，亦可從其一批收藏物品可知一二。佢話個人最愛係八十年代出版嘅《電視週刊》，因該周刊易名之前同之後一期，內頁均附有易名聲明，佢形容睇住有關聲明，感慨時代終結。
縱使百般不捨，亞視光輝歲月結束在即，李鍵邦有三個願望，第一係希望亞視能喺下月一日前播放一系列舊劇集，回饋亞視支持者；第二係希望有份整理亞視片庫，將舊片段好好保存，以免歷史失傳；第三就係希望可以舉辦展覽活動，把個人的麗的珍藏公諸同好。
