政壇：搞搞政：楊岳橋申報 揸舖唔揸樓
喺旺角新春暴亂事件，一批暴徒參與掟磚頭、隨處縱火，事後社會對有關行徑強烈譴責，連當時仍未當選立法會議員嘅大律師楊岳橋，有份向被捕人士提供義務法律支援，都惹來外界質疑。但話雖如此，佢對於外界俗稱買樓就係買「磚頭」，似乎暫時冇乜興趣噃！事關根據佢最新嘅個人利益申報內容，佢未有申報持有任何住宅單位，而同家人一齊持有嘅舖位，亦係其家人早年買入。
同屋企人共同持有
楊岳橋喺上月底新界東補選勝出隨即履新，其個人利益申報內容喺上周五曝光，而身為首名80後議員，雖然最近樓價向下調整，佢原來冇持有「磚頭」，係揸舖唔揸樓嘅一族，另外申報係一間投資有限公司嘅執行董事。
佢接受查詢時話，佢同屋企人共同持有一間公司，位於元朗嘅細舖位係該公司名下嘅物業；至於該間投資公司嘅名稱有佢媽媽個名，佢本人身為公司嘅執行董事，但其實係冇支薪。
當問及若樓價再下挫，會唔會入市，佢話冇咁多詳細計劃，似乎身為專業人士嘅佢，打算睇定啲先，冇諗住為上車而急住買「磚頭」。
