香港專上學生聯會舊年經歷退聯潮後聲勢大不如前，早前傳出現任秘書長羅冠聰任期快將屆滿，下月換屆選舉無人願意接呢個爛攤子，但最新消息指「瘦田冇人耕，耕開就有人爭」，最少兩個人有意競逐新任學聯秘書長，分別係被視為本土派代表嘅中大本土學社召集人何鈞，同埋中大學生會前外務秘書陳旻羲，外界更分析指一旦何鈞當選，隨時將學聯鵲巢鳩佔，將佢變身為一個本土派新平台。

今次學聯新任秘書長之爭有多個特色，首先何鈞及陳旻羲二人都係中大人，換言之無論邊個勝出，未來學聯都會由中大人揸莊，打破最近多屆都係由港大生同嶺大生揸莊嘅局面。

其次係中大學生會早前破天荒出現「撼莊」，最終打正本土旗號嘅內閣「星火」成功接莊，適逢今次學聯秘書長之爭亦有本土派代表，莫非預視其中一方會有優勢？

或促已退聯院校翻兜

而放諸於學聯嘅層面，過去經歷多次改朝換代，近年支持「大中華」更屢被質疑，如果今次本土派代表成功進駐學聯，分分鐘可以將學聯起死回生，再次吸引已退聯嘅院校加入。

事實上，本土派勢力近年與日俱增，最明顯係早前嘅立法會新界東補選結果，本土派代表、本土民主前線梁天琦一鳴驚人，首次打正旗號參選就獲得一成半得票率，有本土派更矢言於九月立法會選舉，於五大直選都要有代表當選，如果今次連學聯都被本土派進佔，睇怕更多學界首投族會成為本土派嘅生力軍嘞！

第一手消息請下載on.cc東網iPhone/iPad/Android/Windows Phone Apps