古人話，百行孝為先。如果一個人無孝心，對長者刻薄寡恩，咁就好極都有限，港產官僚就係人辦喇。

唔係誇張o架，港府對老人家無情無義，早已係人所共知嘅事實。呢，當局尋日舉辦第三場退休保障公眾諮詢會，又有大批示威者到場抗議，炮轟當局假諮詢，要求盡快落實全民退保嘅時間表同路線圖。

市民群情洶湧，可惜官僚詐傻扮懵，而且大講風涼話添。政務司司長林鄭月娥話喎，回歸十八年來，無一屆政府願意處理退保議題，而今屆政府就喺施政報告提出短、中、長期退休保障措施，說明當局好有誠意探討呢個爭議性題目，亦反映政府並無迴避問題。佢仲話，作為一個負責任嘅政府，需要交代落實退休保障嘅公共財政問題，希望退保議題可以繼續向前走咁話。

嗱，呢啲咪就係自欺欺人囉。回歸以來，歷屆港府一直對全民退保推得就推，卸得就卸，無疑係事實，而今屆政府話就話就退保問題展開公眾諮詢，可惜連「全民」兩個字都唔敢提，淨係以所謂「不論貧富」及「有經濟需要」兩個方案掩人耳目，敷衍民意，咁究竟算係乜嘢誠意吖？

更離譜嘅係，退保諮詢未有結果，官僚已經表明傾向設立資產審查，呢啲唔係誠意，而係強姦民意就真。港府唔想承擔全民退保嘅責任，一味搵財政理由做擋箭牌，一時話會出現結構性財赤，一時恐嚇要開徵新稅種，一時又話資源必須用得其所，講嚟講去三幅被，無非就係玩「狼來了」遊戲，愚弄市民。難為高官仲好意思自稱係負責任嘅政府，簡直唔知醜字點寫。

所以話，呢個政府都係冇得救嘅嘞，市民對住呢班涼薄官僚，等於對牛彈琴嘅咋。反正係假諮詢，不如慳番好過，咁咪唔使再被人狙擊囉。

都係古人講得啱，名正則治，名喪則亂。港府刻薄寡恩，倒行逆施，管治想唔亂都幾難。今日香港社會躁動，民怨四起，搞到愈來愈激進，甚至出現港獨思潮，港府本來應該善用儲備，紓解民困，安撫人心，偏偏官僚寧願做守財奴，何止係愚不可及，簡直係政治自殺。咪話太一叮唔提醒，市民嘅忍耐係有限嘅咋，港府繼續與民為敵，萬一民怨爆煲，咁就後悔莫及喇。

講到底，善待老人家等於善待明日嘅自己。港府唔肯善待長者，又點會有好下場吖！