佔領行動後,香港專上學生聯會(學聯)就好似用完即棄咁,先係爆「退聯潮」,跟住又畀本土學生組織夾擊,依家下個月就換屆,但仲未有常委表示願意「接莊」出任新一屆秘書長,現任秘書長羅冠聰想交棒都搵唔到人,唔知後繼無人嘅下一步,會唔會係瓦解之期不遠呢?

學聯依家僅餘五間成員院校,中文大學嘅本土派候選內閣「星火」成功當選後,星火唔少成員之前都曾經表態支持中大退聯,所以他們任內再搞退聯公投亦不出奇。另一成員院校樹仁大學學生會,內閣「仁本」主打本土旗幟,更加因為涉及燒垃圾桶而被捕,若能夠解決校內舉行公投的技術問題,相信都會搞退聯公投,到時學聯成員或會再少兩個。

羅冠聰話,唔使擔心暫時冇秘書長人選嘅提名喎。至於本土派危機,佢就話,如果同學真係選擇退聯,佢亦冇得擔心,要尊重同學選擇。但佢都承認,學聯認受性因為成員組織減少而變低,未來只能找機會嘗試組織同學,但強調學聯不會瓦解。外間一直有傳,羅冠聰喺學聯任期中,好似無心戀戰,更談不上功績,學聯喺佢手上搞到潰不成軍,種種原因,令同學對學聯嘅參與度更減。

第一手消息請下載on.cc東網iPhone/iPad/Android/Windows Phone Apps