中港經濟環境有幾差？尋日國際評級機構將香港主權評級展望由「穩定」降為「負面」，未來似乎更大風大雨。有商界大老就話，依家經濟環境真係不妙，尤其係入咗內地嘅一班廠家，廠商會傢俬裝飾業委員會主席羅富國就形容，當下慘況係佢入咗內地市場二十幾年來未見過，可見，經濟寒冬真係凍到入骨呀！

人仔貶值幫唔到幾多

人稱「安哥」嘅中華廠商聯合會（廠商會）會董吳國安分析，最近人民幣雖然不停貶值，有人以為佢哋呢班以出口為主嘅港商應該笑呵呵，但幣值平咗，經濟市道亦差咗，工廠訂單大跌，因為人仔跌而賺到嘅幾個百分點匯水，對公司盤數其實係「杯水車薪」。

安哥喺內地設廠做電鍍環保生意，亦係香港電鍍業商會前會長，佢直言，好多喺內地設廠做出口生意嘅港商，過去十幾年來因為人民幣一路急升而苦不堪言，但最近人仔跌番，佢哋都係笑唔出，因為經濟不景生意難做，到呢個時候先知道，幣值升跌原來唔係最重要嘅，如果有得揀，佢哋寧願好似往日經濟好景時咁樣，訂單多，就算人仔升值又有乜所謂喎！

羅富國就喺內地做歐洲高檔家具入口批發生意，喺香港就做埋傢俬零售。佢話，內地經濟放緩加上地產市道唔好，連帶對家具需求都少咗，加上中央雷厲風行打貪及節約政策，唔准搞豪華會所，對於做高檔歐洲傢俬嘅佢打擊更加大。羅富國愈講愈心淡，形容依家喺內地無論係做中低檔或高檔家具生意都一樣咁慘淡，情況前所未見，佢希望可以安然捱過呢一波經濟寒冬喇！

第一手消息請下載on.cc東網iPhone/iPad/Android/Windows Phone Apps