孫中山講過，世界上有三種人，第一種人係先知先覺，第二種人係後知後覺，第三種人係不知不覺。港產官僚渾渾噩噩，得過且過，唔使講梗係屬於不知不覺嗰種喇。

唔係亂噏㗎，孫中山史蹟徑被糟蹋，咪就係港產官僚不知不覺嘅明證囉。呢條滿載孫中山及興中會首任會長楊衢雲等十多名清末革命烈士事迹嘅史蹟徑，全長逾三公里共十五個站，係珍貴嘅歷史及旅遊景點，本來應該受到悉心保護，可惜事實啱啱相反，由於港府管理不善，史蹟徑遊人就冇嘞，垃圾就大把。好似第七站楊衢雲被暗殺地點紀念牌及百子里公園咁吖，垃圾遍地，牆壁遍布塗鴉，簡直烏煙瘴氣，根本唔似歷史遺迹，似垃圾崗就差唔多。

除咗衞生環境欠佳，管理更加亂晒龍。第八站輔仁文社舊址隱沒喺橫街窄巷，既冇清晰指示牌，又冇特色擺設物，究竟有幾多人知道呢度係史蹟徑，實在令人懷疑。

當局糟蹋孫中山史蹟徑，何止係對先烈不敬，直頭係暴殄天物。家陣全世界都大力推廣文化旅遊，香港係辛亥革命發源地之一，對中國近代史具有舉足輕重嘅地位，孫中山史蹟徑正係呢段歷史嘅見證，如果保養得好，規劃得宜，悉心包裝，隨時可以成為特色旅遊景點。可惜當局唔識寶，史蹟徑淪為垃圾崗，莫講旅客，市民都避之則吉喇。

講開又講，官僚胡混度日，被浪費嘅歷史遺址又點止孫中山史蹟徑吖。本報早前踢爆，油麻地二戰時期防空洞淪為垃圾洞，後巷滿布污水及雜物，仲散發陣陣尿餿味添。仲有吖，香港僅存六塊「維多利亞城界石碑」之一港島薄扶林道界石碑居然被棄置喺馬路旁，日夜與三色廢物回收箱為伴，而界石碑柱身亦布滿裂痕及污漬，問你服未。

事實證明，港產官僚口口聲聲加強旅遊業競爭力，根本係吹水唔抹嘴。最荒謬嘅係，當局一方面花費大量公帑推廣旅遊，一方面坐視歷史遺址荒棄，唔係本末倒置又係乜吖？

正所謂，忘記歷史意味着背叛。楊衢雲後人尋日同康文署官員會晤，要求加強管理孫中山史蹟徑，包括裝設指示牌、美化百子里紀念公園，以及喺公園內擺放楊衢雲銅像。嗱，呢啲要求順理成章，天經地義，港產官僚唔好再渾渾噩噩嘞，如果唔係，革命先烈遲早搵你哋算帳吖，叮！