城中鏡：郭羅桂珍 想學曲練氣
保良局首間零售社企尋日舉行開展禮，在場見到保良局副主席郭羅桂珍，佢話自覺中氣不足，打算搵個師傅學粵曲練吓中氣喎。郭太話細個一直冇機會學做大戲，但家人就會帶佢去睇粵劇，佢就最鍾意睇任劍輝同白雪仙，因為覺得佢哋做得好入戲，依家閒時都會同老公莎莎國際主席郭少明拍住拖睇粵劇，只要有陳寶珠同龍劍笙就必睇，好彩識得啲朋友，所以都唔驚撲唔到飛。
保良局前主席梁寶珠（左起）、副主席郭羅桂珍同總理陳黎惠蓮，一齊見證新社企「伶345」開展。
今次保良局成立嘅社企叫做「伶345」，係一間粵劇禮品中心，位於一級歷史建築油麻地紅磚屋，保良局舊年向康文署投得呢個項目。中心設計包括竹棚同虎度門等戲曲元素，亦邀得本地手作人特別設計粵劇禮品喺中心寄賣，頭半年免寄賣費，又會定期舉辦工作坊同交流活動推廣戲曲文化。
