城中鏡：族譜藏對聯
東華三院何超蕸檔案及文物中心日前舉行開幕暨命名典禮，該中心將有系統地修復同儲存東華大量歷史檔案同文物，包括一九二五年廣華醫院總冊。喺活動上見到一班董事局成員對文物相當好奇，有人仲諗起自己家族收藏嘅族譜添！副主席Vinci王賢誌話，佢雖然冇見過族譜真身，但自細爸爸王忠桐都有同佢講吓族譜，佢仲識背族譜入面嘅對聯。
王賢誌（左起）、施榮恆、馬清揚同總理楊嘉成大談族譜傳統。
何超蕸話今次係首間大型慈善機構以自資物業成立永久檔案及文物中心。
Vinci話爸爸名字入面個「忠」字，同佢個「賢」字就係嚟自對聯其中一句「忠賢傳世家」入面嘅「忠賢」兩個字。不過，佢就笑笑口話每個細路都唔鍾意自己個名筆畫多，但了解咗呢個傳統後就學識欣賞喇！
馬清揚話要數碼化
同場嘅總理馬清揚話家族每次有新成員出世都會加名入族譜，再印番份副本畀大家保存，睇嚟遲啲都要數碼化至得，萬一遺失都唔怕失傳嘛！不過，依家份正本放喺邊個親戚度佢都要問番先知，但佢已諗定將來個孫改名要用個「禧」字。
至於前主席施榮恆嘅家族族譜就放咗喺家鄉福建個祠堂，由村長保管，有時佢都會帶小朋友返去講解吓家族傳統，但有同宗移民咗去外國，改名就可能未必跟足規矩。主席何超蕸就話今次係首間大型慈善機構以自資物業成立永久檔案及文物中心，並設檔案及文物庫、修復室同數碼工作室等，預計四、五個月後服務就緒。
