馮潔鳴外形亮眼，有機會成為另一政壇小花。
呢幾年政圈掀起一陣小花熱潮，唔同政黨都分別招攬咗「美貌與智慧並重」嘅年輕女性加入。走中間路線嘅民主思路，尋日宣布成立青年團隊並介紹主要成員，初次亮相嘅Veronica馮潔鳴憑亮眼外形，一出場就成為傳媒追訪對象，有人更指佢嘅外形好似港姐冠軍張嘉兒添！
民主思路尋日宣布成立青年團隊，計劃喺北角同馬鞍山設辦公室，歡迎市民到訪交流政策上意見。作為團隊內唯一女將嘅Veronica，○九年喺科大工商管理系畢業，之後一直喺銀行工作。對商界人士甚少有興趣參與政治組織，佢話初時被民主思路舉辦嘅研討會吸引，出席多次活動後就被邀加入青年團隊，但佢暫時未有從政打算，形容自己仲係「學習中」。
興趣研究貧富懸殊
Veronica又話自己由小學至大學都喺香港接受教育，認為受惠於此地，希望加入民主思路貢獻香港。佢話青年團隊中暫未有明確分工，而佢對研究貧富懸殊同義工服務最感興趣，同時希望透過工作時與內地接觸嘅經驗，協助團隊進行中港關係研究。
第一手消息請下載on.cc東網
