近日流傳一個WhatsApp短訊，列明「$應急快錢$」，驟眼睇以為係財務公司借錢廣告，但內容就寫上「先收錢後登記」，又講明「絕非色情非財務」，「全程二十八至三十六萬現金，即日收三至五萬訂金」，仲提到「×××、×××、謝偉俊等律師樓合辦，信譽良好」添！短訊尾段又提到「介紹朋友可抽佣（一萬至三萬）」，仲留低查詢電話。睇完成個短訊，真係唔知「葫蘆裏賣咩藥」？
報警「放蛇」都無用
呢次連「法律超人」、立法會議員Paul謝偉俊亦疑捲入WhatsApp騙案，原來仲受困擾幾個月添！佢話有關短訊唔似係借錢、放貸廣告，亦唔知係咪搵人搞掛名結婚，但佢就完全被人冒名，強調絕無參與其中。佢又話幾個月前已知道有其他電話號碼、包括內地號碼發出類似短訊，四個月前報過一次警，上月再報咗一次，但警方都以「唔夠料」為由拒受理。為求搵出真相，佢亦試過叫義工「放蛇」，覆電話表示有興趣，想了解多啲，希望約見面，但對方就唔肯露面，似乎警覺性甚高。
其實，過去阿Paul已發現內地有人盜用佢律師行嘅標誌，但冇諗到今次被盜名宣傳發生喺香港。佢慨嘆：「報警無用、放蛇又唔掂」，已經有好多人就類似短訊打電話畀佢問個究竟，佢惟有向對方解釋同自己無關，並將事件向香港律師會報告，以便行家知悉。不過，佢最擔心嘅係有人因為呢啲短訊中招、受騙，而唔識或唔敢去報警喎。如果真係有人因為阿Paul個名而受騙，唔知法律超人點為受害者伸張正義呢？
第一手消息請下載on.cc東網
