政壇：高鐵剪布 大開殺戒
因立法會財務委員會未能喺政府宣稱嘅二月死線，通過廣深港高速鐵路香港段工程、涉款一百九十六億元嘅追加撥款申請，財委會今個月仲要繼續努力，但泛民主派議員繼續拉布就「肯肯定」喇，有政黨已呼籲喺財委會加會期間到立會示威。負責主持高鐵會議嘅財委會副主席「橄欖」陳鑑林亦出大鉸剪剪布，將泛民議員就高鐵追撥申請提出嘅一千二百幾項臨時動議，大刀闊斧「剪」剩三十六項。
喺港鐵表明三月先係停工死線，橄欖早前已出招，宣布喺本周五、六及本月十八日召開合共十六小時會議審議撥款申請，泛民為阻撥款就以提交臨時動議方式拉布。財委會至尋日就收到十九名泛民議員提出共一千二百六十二項臨時動議，其中社民連梁國雄就提出咗五百五十二項，係提交最多臨時動議嘅議員。
動議隨時加 咪老定
雖然臨時動議勁多，但橄欖就以內容重複同臨時動議與撥款申請唔係直接相關為由，「剪」剩三十六項，其中被指與撥款申請不直接相關嘅就有一千零六十一項，另有至少一百六十項被指內容重複，要議員自行整合再喺今朝交回秘書處，否則就唔會再喺會上處理。現時數十條臨時動議睇落唔係好多，但議員可隨時再提交臨時動議，相信橄欖都唔好太老定喇！
立法會保安方面，早前立會行政管理委員會已授權秘書處可要求警方到立會示威區候勤，橄欖亦言明如有衝突就交由立會保安同警方處理。相信鑑於上次泛民佔領主席台經驗，橄欖同秘書處都會做好搬竇開會準備。睇嚟橄欖已着好晒全副武裝，剪布勢在必行。
