城中鏡：開心有靚樣
尋日婦女事務委員會喺政府總部舉行三八婦女節慶祝酒會，多名政商界傑出女性均有出席。場內有唔少職場叻女，唔止工作出色，仲係美貌與智慧並重，好似東區區議員李進秋同有「哈佛小甜甜」之稱嘅前港姐兼南區區議員任葆琳咁。講到女性一忙就好易捱殘，佢哋就認為心態最重要，個人開唔開心，好影響外表喎！
李進秋（右）同任葆琳（左）認為只要保持開開心心，就冇咁易殘。
伍婉婷（左起）、劉文文、黎慧賢、陳淑芝同陳曦齡齊出席婦女節慶祝酒會。
羅詠詩（右）指香港女性地位已比其他地方好好多，旁為港鐵主席馬時亨。
瞓夠8個鐘保嫩膚
任葆琳笑言依家好多女士都要兼顧家庭同事業，但佢就淨係嫁咗畀「香港仔」，全副心機擺晒落個區度。佢又話區內啲小朋友好鍾意同佢影相，滿足咗佢做媽咪嘅欲望，好開心。身為人母嘅李進秋同百仁基金副主席羅詠詩就話無論幾忙都好，自己都一定要瞓夠八個鐘，咁先可保皮膚靚靚。羅詠詩仲話喺香港嚟講，女性地位已經比其他地方好好多，而佢自己初出茅廬時做銀行，上司多為外國人，看待男女都算平等。
同場仲有港鐵主席馬時亨、灣仔區議員伍婉婷、香港吸煙與健康委員會前主席劉文文、香港分享聯合創辦人陳淑芝、維特健靈董事長陳曦齡等。陳曦齡話女士同男士喺工作上嘅強項弱項有別，如男士喺體力上有優勢，女士若有男士四分三或一半體力已好好，但女士做錯嘢相對較易獲寬容對待。佢又自爆揸車技術始終冇男性咁好，雖夠安全，但好多人都嫌佢太慢喎。
劉文文則話近年多咗事業女性因工作壓力同社交需要而吸煙，而男女煙民嘅分別係，大多數男煙民都好理性，見啲煙貴咗就會食少啲，但女煙民就唔太着重價錢，因此更難戒煙。
