政壇：搞搞政：立會換主席 象哥出口術
泛民同建制黨派喺九月立法會換屆選舉嘅布陣陸續浮上水面，但立會主席花落誰家至今仍莫衷一是，政圈盛傳熱門人選係建仔「譚Sir」譚耀宗、新民黨葉劉淑儀同工業界梁君彥「三揀一」，幾乎篤定再做多四年嘅進出口界議員「象哥」黃定光忽然大打開口牌，提議一改不成文規定，由直選議員改為來自功能界別議員任立會主席，又力挽譚Sir留任做建制派召集人，莫非象哥想一石二鳥，包括為一向被批認受性較低嘅功能界別同事出番啖氣？
政圈分析指曾鈺成退任主席已成定局，雖則主席位置吃力不討好，但仍有唔少人渴望更上一層樓，象哥忽然提議由功能界別議員接棒任主席，有分析指目標係令建制派有機會同時取得地區直選同功能界別嘅過半數控制權。
認受性恐走回頭路
事實上，議員議案如要通過，必須得到功能界別、地區直選分組點票通過，建制派如要同時取得分組過半數控制權要先過兩關，第一關係地區直選由目前十七席，最少進帳一席至十八席，第二關係落實象哥倡議由功能界別議員任主席，確保可以把分組過半數優勢體現於投票結果之上，提出修改《議事規則》等招數杜絕拉布。
然而象哥此言一出又引起外界無限聯想，先唔好話外界或認為由向來直選議席，改由功能界別議員任主席，喺認受性方面係走政治回頭路，再者佢都係嚟自功能界別，莫非佢心郁郁想「升呢」，但政圈相信呢個機會甚微，事關佢過去經常被發現開會瞌眼瞓，相信佢都有自知之明，唔會偏向虎山行。
