魏余雪奕
金融各界尋日賀三八婦女節，唔知點解見到嘅反而係「好失望」、「誤解」、「遲咗」！先講「好失望」，係恒指成分股女董事佔比冇進步過。話說社商賢匯出統計報告，恒指成分股中女董事比例與舊年一樣，都係11.1%。即係638位董事中，得71位係女性，連社商賢匯行政總裁魏余雪奕尋日都話「好失望」，因為好多女性表現出色，都入唔到董事局。
關蕙
但有少數「好打得」嘅女性，就身兼多間上市公司董事，魏余雪奕話擔心部分女性工作量過重，唔知佢哋點分身。好似創興銀行副主席梁高美懿咁，係九間上市公司嘅董事！佢又話其實董事會人選多元化，對公司業務有幫助，所以啲上市公司應該訂個目標同時間表，畀女性進身董事局。
至於「誤解」，則係港交所員工社團女菁匯主席關蕙話，好多人誤解咗男女平權只係女人嘢喎。佢話，就係呢樣誤解，所以到依家仲未實現到男女平權囉。關蕙又話紐約交易所最近有隻上市代號叫「SHE」（她）嘅ETF，佢希望呢隻ETF都嚟到香港上市。呢隻ETF有乜特別？原來呢隻ETF專投資喺啲性別同年齡高度多元化嘅公司。
咁「遲咗」嘅係乜？就係男女平權午市敲鑼囉。港交所尋日應節，隆而重之為男女平權搞個午市開市敲鑼儀式。主辦單位其中一方MSCI產品部執行董事Charlene Low可能對男女平權問題有太多感觸，致詞時「講多咗」，令敲鑼儀式遲咗一分鐘，喺一點零一分先舉行。在場各位當然唔介意，繼續開開心心敲鑼。
第一手消息請下載on.cc東網
