政壇：打滾政界僅二十年 陳智思自嘲舊電池
陳智思喺九八年年僅三十三歲當選首屆立法會保險界議員，自此走入政圈出任多項公職，包括喺九七回歸後連做三任特首行政會議成員，喺政界打滾至今近二十年，佢尋日接受傳媒訪問時突自嘲係「舊電池」，好多委員會都有佢個名，好似對外界唔係好公平，佢仲提早宣布，計劃做完呢個任期就離開行會，原因係可提供嘅建議同意見都畀咗，應畀機會新人。
陳智思自嘲係「舊電池」，計劃完成任期後會離開行會。（資料圖片）
曾任六年嶺南大學校董會主席嘅陳智思又形容，依家大學校園政治化，學生同校方對立，根源係互信不足，認為掌權者應該行多一步，主動加強溝通，而非只係喺鏡頭下做事。
話時話，現年五十一歲嘅陳智思都自稱係「舊電池」，對於一批真正「舊電池」，好似比佢年長逾二十年、向來被批不甘寂寞嘅「民主阿婆」前政務司司長陳方安生嚟講，佢分分鐘連茄喱啡都不如，真係唔知後者如何自處嘞！
