政壇：林奮強死亡之吻獻財爺
財爺「鬍鬚曾」曾俊華喺上月底發表新一份財政預算案，被狠批「重商輕民、刻薄基層」，香港黃金五十創辦人林奮強過去多次不留情面狠批鬍鬚曾係「守財奴」，原以為尋日出席論壇時亦會係同一調子批評新一份預算案，點知林忽然一反常態，一方面畀八十分，稱讚鬍鬚曾喺預算案有一百八十度轉變，隨後更唔理世俗目光，揚言鬍鬚曾若唔係有咁多鬍鬚，就會攬住佢錫一啖。佢由冷對鬍鬚曾到熱情獻吻，呢個仲唔係「死亡之吻」？
林奮強一反常態，竟想獻吻畀曾俊華。
香港發展論壇尋日主辦預算案研討會，除咗林奮強忽然稱讚鬍鬚曾由收銀員變成財神，一改「守財奴」風格，同場嘅嶺南大學經濟學系兼任教授何濼生同港大社會工作及行政學系榮休教授周永新都未有一面倒唱好，前者指政府應量入又量出，更建議擴闊稅基，後者則指派糖無助改善市民生活同公共服務發展，由此觀之，鬍鬚曾似乎仲未可以自我感覺良好，仍有唔少改進空間。
