政壇：婦女節趕足六場 許曉暉耷頭養神

話說尖沙咀街坊福利會松柏鄰舍活動中心尋日下晝舉辦九龍區烹飪大賽，特首夫人梁唐青儀同許曉暉等應邀為嘉賓，仲喺台上並排而坐，期間許曉暉一度耷低頭疑閉目養神，當梁唐青儀致詞時，佢就全神貫注聆聽。當問及係咪喺台上閉目養神，佢解釋，當時啱啱低頭向下望，整理身上嘅衣服。

許曉暉喺致詞時提及，現時現代婦女既要照顧家庭，又要兼顧自己工作，少啲精力都難以應付，幸好其小朋友已經考完試，毋須再操心；如要數到工作最忙碌嘅時間，佢透露最高紀錄係一日連走十一場活動，所以喺每個地方停留一陣，就要起程去下一個活動。