政壇：「宇」翼豐滿 鴿戰新西
仲有約半年就係立法會換屆選舉，各黨派已就參選名單作最後部署。白鴿黨「乳鴿」、元朗區議員鄺俊宇舊年底就喺黨內甄選提名中，報名參選新界西同循功能組別區議會二出選嘅超級議席，但佢似乎仲係心大心細未落決定。雖然自兩年前推出第一本小說，令佢喺年輕人同網絡世界人氣急升，出選超級議席似有着數，但佢直言自己對新西有「情意結」。而佢嘅決定亦直接影響黨友，因如果佢參選新西，同樣喺黨內甄選報名參選新西、之前喺區議會選舉葵青區敗選嘅尹兆堅將勢危！
論知名度，鄺俊宇選超級議席可以話有着數，但佢尋日就話自己始終出身於元朗，對新西有「情意結」，而且睇番有關新西立會議員同有意參選該區人士嘅民調，佢嘅分數都高過部分現任立會議員咁話。如佢鐵定出選新界西，可以話有人歡喜有人愁，事關同樣有意出選該區嘅「中鴿」尹兆堅、陳樹英論人氣都遜於呢位後生，勢必要讓路，但對錯過黨內甄選截止時間先蠢蠢欲動嘅「乳鴿」區諾軒嚟講，就有望循超級議席翻兜。
「唯一冇網民鬧嘅白鴿」
兩年前開始出書嘅鄺俊宇，每日都有落區跟進市民個案，同時亦為十二個專欄寫文章同小說，甚至有親子媒體搵佢寫嘢。佢話雖然辛苦，但都盡量繼續。佢又話網上都要深耕細作，故希望長期保持同網民接觸，就算選舉時畀對手批評攻擊，網民都識分是非真偽。依家同唔少網絡媒體合作嘅佢，仲講笑話自己係唯一唔會畀網民鬧嘅白鴿黨黨員喎。
