1護士照顧11病人
【本報訊】 流感高峰期持續，求診病人數字大增，醫院只顧不停「加床」應付，護士公會代表直言現時編制每名護士需照顧十一名病人，人手嚴重不足，他促請醫管局正視前線員工流失及培訓前景不明朗問題。
「淨係不停咁加床，但唔加人手，咁邊有人（醫護人員）做，依家護士病人比例係一比十至十一，醫管局都唔敢提一比六呢個指引數字。」香港護士協會主席李國麟批評，現時醫管局轄下醫院人手嚴重不足，護士病人比例與指引相距近一倍，醫院以不斷增加床位應付流感高峰期，令多間醫院的病房超收。
政府只識起醫院
「政府話未來十年要起幾多醫院，會加幾多床位，但就無提過增加人手。」李直言現時編制上人手不足，惟當局未有適當修訂有關編制，「走一千個就請番一千個，都係無加到人，而且請番嚟嘅人需要時間適應。」李指現時新入職護士首年不獲加薪，同時三年內需到不同臨床環境工作，而年資達五至十年的資深員工則苦無升職前景，令新舊員工均萌去意，他促當局正視問題。
