因為電影《重慶森林》而打響名堂嘅尖沙咀重慶大廈，近年變身「低端經濟全球化中心」，據講非洲有兩成廉價手機嚟自呢度，都咪話唔巴閉。可惜吖，由於大量南亞裔酷刑聲請人士進駐，魚龍混雜，藏污納垢，重慶大廈已經淪為「犯罪全球化中心」。

前日之嘛，數名中東遊客光顧重慶大廈買手機，因不忿被劏，同南亞裔職員理論，結果有人態度不佳，出手打人，血濺當場。本報記者近日去重慶大廈內外範圍視察，亦發現全日都有大批南亞裔及非裔人士打躉，除咗小部分為大廈內餐廳拉客，其餘大多數都係無所事事，唔係喺大廈外徘徊，就係喺後巷流連，仲經常向路過市民同遊客上下打量，好似想尋找獵物咁款，搞到當地居民人心惶惶。

咁都未算，記者曾目擊有本地人同南亞幫密密斟，懷疑向對方發出指令。你知喇，假難民作奸犯科，唔係打交就係打劫，唔係非禮就係劈友，簡直無日無之。本地黑幫睇中假難民膽正命平，其中和勝和前坐館「上海仔」郭永鴻手下就有南亞兵團，從事打手、睇場以至貼街招恐嚇勒索等非法勾當，而有小聯合國之稱嘅重慶大廈，正正係南亞兵團其中一個聚腳地，你話係咪得人驚吖。

最無辜係一眾商戶，隨着愈來愈多南亞及非裔人士進駐，貨物經常不翼而飛仲係其次，人身安全無保障先至大鑊，警方話就話已經加強巡邏，但情況一啲都冇改善，受害商戶無奈之下，唯有自行張貼通告提醒大家加強防範，可想而知情況有幾嚴重。

話時話，重慶大廈烏煙瘴氣，七國咁亂，早就唔係新聞咯。年前一名北京來港旅遊嘅女大學生，慘遭印度裔酷刑聲請漢強姦，更加係震驚中港兩地。有人形容重慶大廈淪為化外之地，同當年「三不管」嘅九龍城寨冇乜分別，真係一啲都冇誇張。

當然喇，假難民幾乎將香港反轉咁滯，「三不管」嘅又點止重慶大廈吖。好似蘭桂坊咁，本來係遠近馳名嘅旅遊休閒勝地，自從被假難民兵團攻陷之後，黃賭毒百花齊放，休閒勝地變「人間妖域」。最諷刺嘅係，假難民搞到香港雞毛鴨血，納稅人仲要出巨款供養佢哋，簡直冤哉枉也。

始終都係嗰句︰當斷不斷，必受其亂。港府再唔堵塞漏洞，將假難民拒之門外，香港遲早陸沉嘅咋，叮！