近年香港有形形色色嘅同鄉會成立,將同聲同氣嘅人連繫埋一齊,好似最近有香港五邑總會(總會)成立,並舉行首屆理監事就職典禮,身為五邑人嘅發展局局長政治助理Allen馮英倫話,五邑特產包括新會陳皮,直言夠晒出名,而總會副會長Louisa羅台秦接力推銷當地嘅陳皮燒鵝,其後又好似導遊上身列舉五邑文化景點,反問「有得玩又有得食,仲想點呀!」

羅台秦(右)列舉五邑文化景點時猶如導遊上身,旁為其老公戴澤良。

馮英倫已好耐冇返回五邑家鄉。

岑少雄稱總會未來會着重服務五邑鄉親,發放正能量。

甄韋喬(右)出任總會副會長,細仔廷翰到場支持。

總會早前舉行首屆理監事就職典禮,會長岑少雄就話總會嘅成立象徵六十多個五邑社團團結,目標係希望服務全港逾一百三十萬嘅五邑人。

馮英倫少返鄉

Allen就話已經無乜親戚喺五邑住,已經好少返去。當問及五邑有乜嘢特產好介紹,佢就第一時間講出新會陳皮,直言夠晒出名,但佢同時以過來人身份,告誡大家咪以為陳皮好食,用嚟製陳皮嘅新會柑就好食喎。

本身係台灣人嘅Louisa,喺五邑一帶有唔少投資,加上每年都會去五邑四、五次,因此同五邑關係都好密切,佢其後更落力推介五邑,一方面指試過當地浸溫泉,有助令身心放鬆,另一方面又指當地有清末學者梁啟超故居等文化景點,唔講仲以為有專門帶團到五邑嘅導遊在場。

另一總會副會長Mickey甄韋喬舊年參加交流團時,細仔廷翰唔怕悶陪伴在側,今次Mickey就任副會長,廷翰亦有到場支持,據知現年十三歲嘅廷翰身高約一米七,又鍾意打籃球,而且有意向入港隊嘅目標進發,唔知Mickey會否全力支持廷翰嘅志向呢?

第一手消息請下載on.cc東網iPhone/iPad/Android/Windows Phone Apps