政壇：梁美芬安心工作 靠湊仔「公」
唔少雙職父母都依靠外傭或託兒服務照顧子女，但亦有例外嘅，好似育有兩名兒子嘅立法會議員梁美芬話，兩個仔細個時只會交畀信任嘅人照顧，又笑言自己「執到支好籌」，因為本身教書嘅老公可以教阿仔做功課同溫習，而佢就負責同阿仔玩遊戲，順便培養感情。
梁美芬話兩個仔只會交畀信任嘅人照顧。
梁美芬尋日舉行記者會，談及改善託兒服務，幫助婦女就業嘅建議時，分享自己湊仔經驗，指兩個仔相差十四個月，佢同老公一旦病咗或外遊，只會交畀姨媽或家姐湊。佢又認為有無人照顧子女，好影響媽媽出外工作嘅意欲，甚至係生育問題。
當問及當年有無諗住生多個，佢自言雖然好鍾意小朋友，但當年腰骨痛，打算抖吓，所以最終只係生咗兩個。
