泛民陣營爭取喺立法會俗稱「超級區議會」嘅區議會第二功能界別力保三席，基於兩名現任超級議員民協KK馮檢基同白鴿黨「AV仁」何俊仁喺舊年底區選落敗，失去超級議席入場券，預料角逐連任只有白鴿黨涂謹申，據知白鴿黨亦會派出乳鴿，例如元朗區議員鄺俊宇或南區區議員區諾軒喺另一張名單排頭位，爭取該黨「坐一望二」。至於最後一席，據知民協、街工同新同盟都蠢蠢欲動欲染指。

由於KK已失去超級議席參選入場券，民協有意改派深水埗區議員何啟明延續超級議席控制權，然而何啟明同KK嘅知名度「不可同日而語」，難以獲得泛民其他陣營中人「開綠燈」支持。點知早前又殺出程咬金，身兼葵青區議員嘅街工梁耀忠，同埋西貢區議員嘅新民主同盟范國威忽然表態考慮轉戰超級議席。

泛民建制六爭五

街工如要挑戰超級議席，首要解決嘅問題係向其他泛民中人借夠提名票入場；新同盟剛好有十五名民選區議員穩握入場券，加上區選嘅勝出率強橫，若范國威決定趕上超級議席尾班車，預料將主打本土旗號，盡攬本土派、傘兵支持票，同白鴿黨兩張名單嘅定位有清晰嘅分野。睇嚟民協同街工代表會被篩走，范國威就被睇高一線，唯一要解決係由邊個頂上，力保原有嘅新東議席。

建制派嘅基本格局係「二加一」，即建仔主席李慧琼孖住剛喺新東補選落敗嘅周浩鼎，加上再次轉換跑道嘅工聯會王國興，如無意外將係泛民同建制三對三對決，六張名單爭取五個議席嘅格局，就睇邊個最後被淘汰，同超級議員銜頭擦身而過嘞！

第一手消息請下載on.cc東網iPhone/iPad/Android/Windows Phone Apps