政壇：鄭國漢見過鬼唔怕黑

港大自從舊年發生首次學生衝擊校委會同禁錮校委風波後，校方就以安全為由，將開會地點由大學本部鈕魯詩樓，移師至位於沙宣道嘅香港賽馬會跨學科研究大樓，但會議搬到本部以外仍無阻衝擊事件發生，搞到上月嘅校委會需要破天荒改到校外，喺灣仔會議展覽中心舉行，但呢個改動就令會議順利完成喇！而中大校董會亦一直喺校外舉行，睇嚟校董會並非一定要喺校園內進行先得。

澄清冇「落荒而逃」

鄭國漢喺上月校董會中被圍，更被指要推開學生先逃離到現場，但佢見過鬼唔怕黑，好似未有將會議地點改到校外嘅打算。佢話校董會開會地點要由校董會決定，更澄清當日並非「落荒而逃」，只係搵另一條路徑進入會議場地喎。

佢一再重申，早前校董會所同意嘅，係喺會議中討論係咪成立專責小組，去檢討校董會組成同埋特首校監必然制等，並冇承諾過一定成立相關小組，認為校董會已兌現承諾就議題作出深入討論，所以先作出集中資源提升學術水平，而非成立相關小組嘅決定。相信有關言論學生實唔會收貨，但鄭國漢話會繼續同學生溝通，更會喺十日之內同新任學生會成員會面添！

至於本土派學者陳雲早前宣布「撤離」嶺大，鄭國漢就以私隱為由，拒絕評論有關決定，但佢強調嶺南大學有完整及健全機制，檢視教職員嘅教學表現、服務水平同研究表現，似乎暗示陳雲表現欠佳，不獲續約同政治無關喎。