版權修訂條例胎死腹中，高官炮轟政客拉布，叫大家「認住呢班人」。其實，拉布問題愈演愈烈，點止版權修訂條例受阻吖，基建工程成本不斷飆升先至大鑊吖。

發展局局長陳茂波話喎，因為承建商擔心要承擔立法會拉布風險，令標書延遲簽約，部分工程標價上升。咁點算好呢？當局除咗將會根據施政報告及預算案建議成立工務工程成本控制辦公室，仲會實行新合約形式，為政府負責金額制訂封頂條款；日後政府工程嘅設計亦盡量實而不華，多用預製組件，希望可以減省百分之三成本咁話。

即係咁，近年基建工程多災多難，幾乎無一不延誤，無一不超支，當局諗計補鑊，固然無可厚非。特別係近年唔少工程華而不實，洗腳唔抹腳，早已備受詬病，家陣改弦更張，開源節流，當然係應有之義。問題係，諗就係咁諗喇，但究竟做唔做得到呢？係人都知，政府所有工程撥款都必須經立法會一關，如果反對派繼續拉布阻撓，乜都寸步難行，就算工程成本封頂都冇用喇。

講到底，香港係自由市場，標書條件根本唔到港府話點就點。立法會拉布走火入魔，係人都怕怕，如果冇承建商敢低價接標，港府只能夠焗住提高標價，最終咪又係嘥氣。仲有吖，本港基建工程淪為財政黑洞，郁吓就超支幾十億甚至過百億元，承建商就算簽咗合約亦隨時可以反口嘅啫。好似高鐵超支咁吖，負責工程嘅港鐵都唔肯孭鑊喇。

所以話，一損俱損，立法會拉布已經成為施政攔路虎，版權條例係咁，基建工程亦係咁，如果政客繼續為反對而反對，無論港府點樣出招，都係嘥氣嘅咋。冇錯，政客阻頭阻勢確係抵鬧，但港府束手無策，一味望天打卦，咁又使唔使「認住呢班官」呢？

事實證明，基建工程頻頻延誤及超支，立法會有責任，政府亦有責任。如果港府唔係烏龍百出，問題多多，授人以柄，反對派就算想阻撓，都無從入手喇。正如有人話齋，當局想解決基建工程超支問題，除咗工程設計實而不華，更重要係港產官僚實而不華，認真做好自己份工。

港產官僚鍾意引用武俠小說，其實，武俠小說所講嘅最高境界係「手中無劍，心中有劍」，只要港產官僚能夠學到皮毛，就唔使處處受制於人，搞到咁狼狽喇，叮！