SUN搞作:SUN官場現形記:鎖出大頭佛
房屋署靠害,公屋一條鎖匙可以打開不同樓層住戶的鐵閘,市民梗係激氣,於是搵署長康康理論,兩人嘈到面紅耳赤,一齊睇吓。
(資料圖片)
市民:我屋企條鎖匙竟然可以開到另外兩個單位嘅鐵閘,你話係咪離譜先?
康康:哇,咁難發生嘅嘢都發生到,睇嚟你要去買六合彩!
市民:玩嘢咩?明明係你做嘢馬虎,仲想扮冇嘢?
康康:其實咁啱得咁蹺開到,唔使咁擔心嘅……
市民:唔擔心就假,啲鎖咁易開,隨時畀賊仔爆竊,快啲同我換鎖啦!
康康:暫時未有計劃換鎖,要換你自己換啦!
市民:搞錯呀,蘇州屎要我畀錢?
康康:係,間屋你住嘅,我幫唔到你。
市民:好喇,好喇,我自己買鎖……
康康:你終於識諗喇?
市民:買個鎖鎖住你,唔使再畀你出嚟獻世,將公屋鐵閘搞到「道道通」靠害市民呀!