政壇：一索得男 劉燊濤有秘訣
香港工業總會青年委員會一眾成員早前趁新春佳節歡聚，坐埋一枱竟然傾起湊仔經，事關當中唔少成員都係最近成為新手父母，好似委員陳雪兒個小朋友就剛剛出世五個月，而主席劉燊濤（Gary）去年就一索得男，講到生仔、生女分別有咩秘訣，Gary透露真係有親身試過唔同方法，聽聞食得牛肉多，生仔機會都大啲。
劉燊濤話多食牛肉一擊即中生咗個仔。
Gary講笑話父親劉展灝係生產力促進局主席兼有兩個仔，梗係要向佢請教，而佢得出結論就係要養精蓄銳，不可操之過急，密密「造人」，情緒要慢慢培養出嚟，相隔幾日可能反而更事半功倍。聽聞食得牛肉多生仔機會大啲，而食菜同食雞肉多就多數生女，咁啱佢好鍾意食牛肉。
同場仲有副主席陳允誠，佢諗起當年聽聞嘅係啱啱相反，話食牛肉會生女，食雞同菜先會生仔，究竟聽邊個先啱呀？不過，佢當年食牛肉多，亦生咗兩個仔，但佢話生仔生女都一樣咁愛錫喎。
