政壇：搞搞政：「大陸喱」扮本土 梁天琦被起底
旺角暴亂之後，本土民主前線（本民前）梁天琦在新東補選取得六萬六千票，仲有機會九月再出戰立法會選舉添，不過，選戰之後，「槍打出頭鳥」，梁天琦都好快被網民大起底，有人質疑他並非香港出生，嘲笑其「大陸喱」扮本土派。梁天琦尋日承認非在本港出生，但認為邊度出世無大不了，仲話只要擁護廣東話、香港價值就是香港人。但本土派唔係反赤化、反對單程證新移民來港嘅咩？
有人搵到梁天琦幾年前嘅長髮相。（互聯網圖片）
梁天琦人氣急升之際，網上有關佢嘅傳言亦滿天飛，有人搵到佢幾年前參與大學宿舍活動時嘅舊照片，形容當時留長髮的梁天琦貌似「大陸喱」，更被發貼指佢並非香港出世，梁天琦認為，香港人嘅定義係不論出身，不論何時來港，而是看你是否擁護香港的價值觀及文化背景，他更反問：「唔通唔係香港出世就唔係香港人咩？」佢早前曾經喺訪問中透露，其母係內地移民。梁天琦話：「嚟香港二十四年、講廣東話、喺香港工作，都叫新移民？」
本土派一直斥罵內地人係「蝗蟲」，又反對政府容許單程證新移民來港。但梁天琦同樣被指非本地人時，就「搬龍門」，將「香港人」重新定義一番。點都好，今次佢哋本土招牌被打爛，使唔使學當年台灣李登輝個「新台灣人」定義咁，再整個「新香港人」招牌呢﹖
