政壇：建仔立家規 兩屆要交棒
立法會區議會（一）功能界別議席（區一）向來是建制派囊中物，更被民建聯（建仔）視為「黨產」，甚至在黨內落實「真普選」嘅遴選機制，現有陳學峰、鄭泳舜、洪錦鉉及劉國勳四人報名爭奪。據知有個別參選人為爭取黨友支持，表明一旦當選，無論如何最多只做兩屆就會交棒，然後自覓出路，呢個規矩一旦確立，建仔新人都容易出頭啲！
轉戰直選 自生自滅
早前我哋已講過，建仔有意就區一議席「抄橋」，學工聯會規定黨員只可以出任勞工界議席一屆，之後要轉戰直選嘅制度，但聽聞建仔睇到過去工聯會亦只有王國興成功轉任直選，所以呢個諗法亦不了了之。不過，一屆唔得，兩屆都有得諗。有分析指，立法會新丁若只做四年，就入直選戰場自生自滅，隨時送死都似，如果做夠兩屆，累積到一定知名度，轉場讓路予黨內兄弟，雙贏機會可能高啲。
據知，建仔對呢個構思已經達成共識，未正式表態嘅參選人當選後亦要跟規矩。
不過區一議席工作有幾多、發揮有幾大，真係有辦你睇，現任議員葉國謙做過咩相信無乜人知，所以四年鋪路轉直選都話唔夠時間，真係得啖笑，後生嘅第二、三梯隊都話最少做兩屆共八年，難怪老一輩做極都唔肯退喇，更反映班後生有遠見，功能界別真係千秋萬代、永垂不朽！
除咗區一，適逢九月立法會選舉建仔有「四老」退下火線，有黨友甚至建議新制度將來可擴大至所有直選議席，做夠八年後要不按政治旋轉門加入政府，要不就退居幕後培訓政治人才，同建仔去年推出「瘦雞餐」利誘區議會元老交棒有異曲同工之妙。不過，眼前陳克勤已經做夠八年，黃定光更加邁向十六年都未言退，呢個烏托邦恐怕只係第二梯隊一廂情願，否則唔會傳陳曼琪退黨係為求出路喇。
