近排有首網絡歌曲《亞視永恒》大紅特紅，一句「Loop到下個世紀，仲未埋尾，亞視永恒，執笠嘅係你」，唱出呢間老牌電視台嘅處境。

話說亞視大限將至，好快變成集體回憶，點知「彌留」之際仲是非不斷，搞到滿城風雨。由於臨時清盤人無法就資金投放問題同新投資者達成共識，單方面宣布遣散所有員工，隨時提前「熄機」；而股東代表就批評清盤人阻撓亞視發展，強調未有停播時間，仲公開展示一篋現金，話係新投資者「送畀亞視」，證明有能力繼續營運喎。

所以話，鬧劇就係鬧劇，亞視行將就木，雙方唔諗辦法好好埋尾，反而隔空罵戰，你話係咪搞笑吖？如果將呢啲橋段拍成電視劇，話唔定可以刺激收視率，咁就唔使搞到今時今日嘅地步啦。

公說公有理，婆說婆有理，新投資者同臨時清盤人究竟誰是誰非，外人好難判斷。不過咁，電視台佔用大氣電波，受到通訊事務管理局規管，依家醜態百出，鬧劇連場，連幾時「熄機」都有唔同講法，有冇再兒戲啲吖。

話時話，亞視內部管理混亂，固然係走向衰亡嘅主要原因，而當局對種種亂象袖手旁觀，同樣難辭其咎。行政會議去年四月已否決亞視續牌申請，早就應該預咗遲早會停播，弊在當局一直只當亞視欠薪事件係普通勞資糾紛，最多只係罰款了事，完全冇阻嚇性。正如有立法會議員話齋，去年聖誕前已知道亞視執梗，當局處理失當，搞成咁嘅爛攤子，都唔知點收科。

講起真係令人唏噓，上世紀七、八十年代，香港影視文化曾經輝煌一時。港產電影幾乎獨霸東南亞市場，被譽為「東方荷里活」；電視方面亦百花齊放，三間免費電視台鼎足而立，製作唔少高質素嘅節目，被視為香港電視業嘅黃金年代。可惜吖，隨着其中一間電視台倒閉，剩低兩間一強一弱，一間坐享其成，一間不思進取，搞到節目質素每況愈下。加上香港市場實在太細，而內地製作又青出於藍，本地影視產業江河日下，連兩間免費電視台都養唔起。

正所謂，一葉落而知天下秋。亞視作為全球第一間中國人嘅電視台，居然淪落到咁嘅地步，正正係成個香港不斷沉淪嘅縮影。港產官僚不思進取，香港唔止冇運行，遲早齊齊「熄機」嘅咋，叮！