尋日喺傳媒春茗見到信興集團主席兼行政總裁David蒙德揚，冇見一排，睇落佢清減唔少，一向熱愛馬拉松嘅佢，唔通係跑步減肥成功？但原來佢一月病咗一段時間，曾經做過切大腸手術。David話佢嘅大腸有家族遺傳病，其中一段腸容易發炎，一月時入院以微創手術開咗三個窿，切除咗一段大腸，令佢短短兩星期內達到減磅五公斤嘅目標，依家重六十公斤，雖然減肥成功，「但捱一刀唔係過癮o架！」

蒙德揚一月做完切大腸手術無耐，就去跑馬拉松。

幸好，睇嚟David身體狀況都唔錯，事關佢做完手術後，都可以跑馬拉松，早前二月初仲飛去東京做body spa試礦物泥，尋日睇落亦相當精神。佢話今次病完之後，發現身體健康最緊要，明白公司啲嘢，你唔做自然有人做，唔好咁執着。不過，佢咁有心親飛東京公幹，似乎仲未放得開囉！

第一手消息請下載on.cc東網iPhone/iPad/Android/Windows Phone Apps