城中鏡：長衫 旗袍 有段古
「長衫」同「旗袍」有乜分別？金紫荊女企業家協會（協會）日前就邀請長衫薈顧問兼香港歷史博物館特約研究員李惠玲喺活動上講解。李惠玲話七十年代前，廣東地區嘅「長衫」通常指男女裝中式長袍，由來已久，「Cheongsam」一詞更收錄咗喺《牛津英語字典》，專指女性長衫。至於「旗袍」就係七十年代後香港先普遍使用嘅名詞，專指二十年代以後上海流行嘅女性袍服。
彭芷君（右）瘦咗二十磅，着起長衫好好睇；左為研究長衫多年嘅專家李惠玲。
蔡毅明（左起）、馬天惠同時裝設計師Ranee K交流着長衫心得。
沈貝嘉（左）同經營Blow Dry Bar嘅好友張璐妍一齊介紹長衫與髮型配搭。
對於有人指「旗袍」係旗人嘅袍或國服，李惠玲就話至今未有定論，但睇番一九二九年《服飾條例》中規定女子禮服嘅「衣」，基本與男子禮服相同，並無提及「旗袍」之名。而長衫愈長開衩就愈高，方便行走，但要留意坐姿儀態；長度較短嘅開衩則較細。至於領口方面，愈高挺同貼近頸項愈端莊。佢仲笑言，好多中式食肆服務員嘅制服選用織錦布料長衫，唔想同服務員「撞衫」宜揀其他布料。
彭芷君練出「瘦」氣
喺活動上見到身穿蝴蝶花紋長衫嘅協會主席彭芷君瘦咗成個碼，原來佢近八個月積極減肥，戒食飯類，每晚六點鐘後唔再進食，再加一周最少兩次運動，成功減咗二十磅咁多，下咁多苦功，難怪連外套個衫袖都「有位出租」，抵佢着起件長衫咁好睇。
同場仲有常務副主席丘璟珊、林淑怡、副主席李凱琪、成員蔡毅明同沈貝嘉等。專門設計長衫嘅蔡毅明話用料同細節位都係令長衫變時尚嘅關鍵，而沈貝嘉同李凱琪則喺上海買到心頭好長衫，李凱琪鍾意黑色，可以返工同出席活動兩用，沈貝嘉就帶埋引入歐美Blow Dry Bar到港嘅好友張璐妍出席，介紹長衫同髮型配搭。
