政壇：搞搞政：立會教界激戰 「山」火燎「源」
喺立法會功能界別議席當中，傳統泛民主派大多穩取教育界、法律界同社福界，但早前新界東補選結果，令人驚嘆激進本土派支持度轉化成選票之多，九月換屆選舉勢必向傳統泛民步步進逼。立會教育界議席向為親泛民教協代表嘅囊中物，全因教協係教界最大嘅工會，如不獲教協推薦，基本上都難言勝算，過去多屆親建制教聯會派人出征都鎩羽而歸，據聞教聯會打算派副主席蔡若蓮出選九月立會，勝算幾大實可預見。但堅城往往從內攻破，表現較激進嘅進步教師聯盟韓連山近日開始放風，表明想代表教協出選，隨時打亂現任議員葉建源嘅連任大計。
據聞韓連山嘅講法，係以往教協由司徒華出戰直選、前議員張文光選教育界議席，但依家只剩葉建源一個立會代表，既然咁，不如搵個現任議員轉戰直選，望以知名度取勝，而教育界議席就留畀新人出選。其實佢兩年前已組織進步教師聯盟，又選過教協監事會，最後不敵張文光嘅主流派，雙方牙齒印甚深。韓嘅提議即係送葉建源一程，畀自己可輕鬆進身議會，但教協主流派又點會坐以待斃呢？
社福界佔中人拗手瓜
另外，社福界亦係由社工總工會主導主流派出選名單，近兩屆選舉都係由社總張國柱當選。但阿柱前年患上惡性胃淋巴瘤，休假兩個月治病，雖然之後復工，但令連任問題有變數。
曾健超之前喺公文袋內甄選表達參選意向，但佔中死士邵家臻亦蠢蠢欲動，要視乎阿柱係咪出選，如果阿柱放棄連任，據聞邵家臻就打算同曾健超拗手瓜，望爭取社總推薦。無論兩人誰勝誰負，將來社福界幾已肯定會由激進派主導。
