政壇：新秀麗CEO圓15年美夢
前排有關新秀麗收購高檔篋、公事包品牌Tumi嘅消息傳到行一行，尋日朝新秀麗正式落實以百幾億收購Tumi兼提出私有化。不過，新秀麗行政總裁Ramesh Tainwala尋日喺記者會上就話，喺新秀麗做咗近二十年，過去十五年來都想將Tumi收歸旗下，卒之到尋日終於成功，好似「圓夢」咁！佢嘅語氣講到咁恨，點知原來Tainwala自己從來未用過Tumi嘅產品，仲自爆喺記者會三個鐘前，先至用「人生第一個Tumi公事包」，但佢好識做，大讚公事包非常好用。
Tainwala（中）喺好多年前已經對Tumi好有興趣。
其實呢個時候，讚Tumi好用就梗，單收購成百幾億o架。咁點解佢咁遲先用Tumi？Tainwala就笑笑口答，一路都係用開新秀麗自己品牌嘛！
查實一二年Tainwala仲做緊亞太及中東地區總裁嗰陣，已經對Tumi好有興趣。雖然無提出收購，不過都講過該品牌係適合嘅目標，可惜當時行政總裁Tim Parker（現任主席）覺得估值太高而不了了之。到一四年十月，Tainwala坐正行政總裁，事隔一年半後，新秀麗就宣布收購Tumi。所以話「圓夢」真係意味深長。
話時話，恨咗十五年，仲使成百幾億買番嚟，Tainwala之前真係未用過Tumi？
