政壇：區會玩拉布 泛民得啖笑
由於深水埗區議會嘅建制派同泛民主派議員數目勢均力敵，選委員會正副主席時已「立法會化」，有泛民議員「拉布」，搞到晚上約十點先完會。不過，原來泛民「有頭威、冇尾陣」，拉布拉到第三次已經收皮，上晝十一點幾就開完會，皆因發現太多建制派區議員係全職議員，開會開幾夜都得，同泛民議員鬥磨爛蓆，令拉布呢招喺區會作用唔大，白嘥體力。
有地區消息透露，民協譚國僑同梁有方等泛民區議員，第一次拉布後，喺之後召開嘅大會繼續透過不斷長時間發言，同提出無乜特別意思嘅臨時動議拉布，搞到個會開到八點幾九點鐘先完。消息又話泛民拉布期間試過聲言要拉隊離場，但其實係民協當晚搞咗個蛇宴要去，認真離譜！但玩埋呢次後，到第三次開地區設施委員會時，泛民唔再拉布喇，會議開咗約兩個鐘就完，之後多次會議都未見有人拉布，全因建制派盡享地利同人和嘅優勢，泛民根本唔夠玩。
開會點人 隨時現身
建制派區議員大部分都係全職議員，要坐定定喺度開會，完全冇問題，隨時得閒過班泛民，加上深水埗區比較細，區議會位置鄰近有數個選區，曾試過有個別建制派區議員行開行埋，唔夠人開會時，一個電話隨時現身，快過叫外賣，根本就唔會出現拉布拉到流會嘅情況。
睇錯形勢 東施效顰
其實，唔少立法會議員因身兼數職，分身不暇先導致流會，但區議員情況完全唔同，呢班泛民未睇清形勢，結果東施效顰，認真可笑。與其玩政治花招，不如多花時間做實事，希望佢哋真係回頭是岸啦，否則下屆區選愈輸愈多。
