政壇:搞搞政:「強」賺奶粉錢 唔要侍產假
工聯會立法會議員郭偉強日前一索得「猴子」,可喜可賀,不過,呢個爹哋就未放夠三日男士侍產假,尋日已經復工出席財務委員會會議,仲又去咗請願。膊頭負擔大咗,郭偉強有自己嘅打算,佢話與其放假,佢寧願爭取連任議員賺多啲奶粉錢咁話。
郭偉強尋日帶埋假BB公仔請願,要求將打工仔嘅男士侍產假追上公務員,即係享有五天全薪侍產假,雖然佢只係抱住假BB公仔,但新手爸爸依然一臉父愛,仲幫假BB整好笠帽,好似驚BB凍親咁。佢哋引述調查指七成二受訪者認為七日侍產假先足夠,近九成三人認為侍產假應該獲支全薪。
去唔到產前講座「嬲嬲」
郭偉強訴苦話,立法會經常加會,過去五次產前講座,甚至產前視察產房,佢都陪唔到太太出席,搞到佢有啲「嬲嬲」,所以早已承諾會陪太太入產房生BB。佢話,爭取連任係首要目標,轉戰直選冇回頭路,一旦當選,BB未來四年都有安穩生活,唔放侍產假又有乜所謂喎。