香港回歸後實行「一國兩制、港人治港」，話就話資本主義制度同生活方式不變，確保長期繁榮穩定，可惜事與願違，回歸十九年來深陷政治泥沼，爭拗不斷，七國咁亂，尤其係反對派政客無事生非，拉布流會成為家常便飯，搞到「港人治港」淪為「拉布治港」，睇見都眼冤。

呢，好似版權修訂條例咁吖，經過立法會超過兩個半月嘅漫長拉布戰，先後出現五次流會，搞到港府要提前跪低，話如果下周未能通過會「就此作罷」喎。唔怪得有人嘲諷現屆政府「成熟一項、推出一項」，變成「推出一項、跪低一項」喇。

正如有學者話齋，今次港府「輸得好丟臉」，一條本來冇太大爭議嘅條例都搞成咁，想唔認無能都唔得喇。最諷刺嘅係，反對派得勢不饒人，諷刺港府「兒戲、意氣用事」，都唔知好笑定好嬲。唔使問阿貴，經過今次跪低，港府威信進一步受創，日後反對派只會更加有恃無恐，拉布流會更加頻密，施政更加寸步難行。

話時話，政府無能，政客無良，版權修訂條例受阻只係冰山一角咋。現屆政府成立創科局，經歷三次觸礁及長達三年半嘅拉布戰，最後至僥倖過關。而跨境大型基建更加阻力重重，尤其係港珠澳大橋及高鐵工程一拖再拖，造價一漲再漲，最後統統由納稅人埋單。港珠澳大橋追加撥款幾經辛苦總算過咗關，而高鐵追加撥款仲喺度望天打卦，萬一過唔到，工程隨時爛尾都似。

可以見到，喺拉布影響之下，延誤審議嘅法案就多達二十七條，唔少與民生息息相關。早前運房局去信立法會，指東隧三十年專營權今年八月屆滿，若本屆立會會期內無法通過有關條例草案，即使港府接管東隧也無法收取隧道費，而且無權委任管理人員，到時東隧可能變為免費隧道，造成港九大塞車，都咪話唔大鑊。

仲有吖，財政預算案啱啱出爐，按慣例要喺三月提出臨時撥款議案，並於三月底前通過，否則政府分分鐘無糧出，好多部門要暫停服務。你話反對派政客會唔會高抬貴手呢？睇怕都幾難咯，叫佢哋唔好拉布，即係叫豬乸上樹啫。

正所謂民生無小事，政治爭拗唔可以當飯食，拉布阻撓港府施政事小，拖死香港事大。近年香港競爭力不斷下跌，繼續咁樣搞落去，想唔邊緣化都幾難，叮！