城中鏡：點止見過咁簡單
創新及科技局局長楊偉雄好自豪曾經同被稱為科技界「神人」嘅Steve Jobs（喬布斯）有一面之緣，結果被網民瘋狂嘲笑。仁愛堂日前喺沙田馬場舉行盃賽，主席史顏景蓮同一班董事都配合主題以桃花色彩盛裝出席，充滿節日氣氛，見到仁愛堂前主席史立德，佢自言唔止見過喬布斯，仲合作過添！
史顏景蓮（中）同丈夫史立德（右）、女兒史佩加配合主題作桃花色彩打扮，倍添喜慶氣氛。
曹貴子（中）、何歐陽翠華（右）同女童軍總會前總監彭徐美雲齊向大家拜年。
徐炳光話公司嘅出口生意多以美元交易。
從事印刷同包裝生意嘅史立德話，佢公司製造嘅多數係產品嘅包裝紙盒，例如iPhone同iPad嘅包裝盒。咦！咁佢咪見過喬布斯囉？咁梗係啦！史立德話由第一代產品個包裝盒起，佢已同喬布斯一齊研究點整，認為要打造一個國際品牌一定唔可以再用以前啲核突紙盒，要令人一拎上手就印象深刻，連掀起盒蓋時盒身慢慢向下墜嘅感覺都要充滿品味，令人唔捨得丟咁滯。
曹貴子慈善App惠基層
同場仲有副主席曹貴子、總理何歐陽翠華同前總理徐炳光等，講起近期英國脫歐風波，徐炳光話佢哋大部分生意都用美元交易，所以影響唔大。講番仁愛堂服務，史顏景蓮成立咗一間青少年醫療中心協助有專注力失調或過度活躍症嘅人士，又資助基層兒童溜冰等。而曹貴子早前籌辦用以配對善長同多個慈善機構嘅手機應用程式，就趁新年幫慈善組織籌到多封「利是」，喺正月十五到深水埗等地派畀基層家庭。
