《二○一四年版權（修訂）條例草案》自去年十二月喺立法會大會恢復二讀以來，泛民主派就開始瘋狂「拉布」，短短兩個多月，七次開會，就有五次流會。商務及經濟發展局局長蘇錦樑（Greg蘇）被泛民拉布玩殘之際，日前終表示要「作罷」。身為Greg蘇直屬上司嘅財政司司長曾俊華（鬍鬚曾），冇幫手不特止，尋日仲喺電台節目大講風涼話，話自己處理危機嘅方式係做好準備，水未浸就先去堆沙包。但睇佢就版權例嘅表現，卻似係翹埋手睇Greg蘇遇溺多啲喎！

泛民上月曾要求就版權例同政務司司長林鄭月娥會面，當時林鄭已公開表明草案係由商務及經濟發展局負責，該局直屬財政司司長，並非政務司司長管轄範疇，不過，林鄭都喺上月底帶蛋撻、燒味去立法會探建制派議員，打吓氣。相反，Greg蘇嘅頂頭上司鬍鬚曾就連影都冇，隔岸觀火，至日前Greg蘇宣布劃下「死線」，鬍鬚曾先講版權修訂條例草案受業界同法律界支持，對本港經濟亦十分重要，盼泛民下周支持法案通過。佢呢番話嚟得咁遲，算點呢？

難為鬍鬚曾尋日出席個電台節目，大談佢應對危機嘅手法，話更願意防患未然，喺海嘯來臨前靜靜地堆沙包。如果真係咁，點解版權修訂條例草案會變成依家咁呢？

第一手消息請下載on.cc東網iPhone/iPad/Android/Windows Phone Apps