政壇：葉文炘過檔續做輪后
過去一年嘅投資市場風高浪急，窩輪呢個風眼仲傳出好多不利消息，有唔少小股民熟悉嘅輪商都相繼淡出或摺埋，連輪后都買少見少。去年大和窩輪部門「執笠」後，前大和「輪后」Abbie葉文炘喺媒體絕迹半年有多，不過我哋收到風，佢已加盟瑞信，職銜係瑞信香港認股證及牛熊證部門嘅「銷售經理」，公司話將增加佢喺媒體嘅曝光率。
葉文炘已加盟瑞信，股民好快可以見番佢喇。（資料圖片）
Abbie話加盟咗瑞信約一個月，好開心有呢個機會繼續喺衍生工具方面工作。唔講唔知，佢原來經過多輪面試同篩選，事前做足準備工夫，先至入到瑞信o架！咦，家陣輪證市場唔係收縮緊咩？瑞信香港認股證及牛熊證銷售主管何啟聰解釋，依家佢哋同排名前列嘅發行商相比，其實係較缺人手嘅；加上瑞信着重長線業務發展，故唔會受短線嘅市場波動影響。
