政壇：錯選「新果東」 周浩鼎贏硬
民建聯（建仔）嘅宣傳品成日畀網民發現出錯，繼立法會議員鍾樹根舊年區議會參選漁灣選區嘅宣傳單張串錯自己英文名後，建仔喺明日投票嘅立法會新界東補選又再被揭犯錯。學民思潮成員黎汶洛喺社交網站轉載朋友嘅相片，指建仔候選人周浩鼎嘅宣傳單張將選區「新界東」寫成「新果東」。
周浩鼎嘅宣傳單張上把選區「新界東」寫成「新果東」（圓圈示）。（互聯網圖片）
黎汶洛話份宣傳單張出錯係朋友發現，又引述朋友指周浩鼎可能會自動當選，因為「新果東」係全港首創第六個選區。有網民質疑周到底係參選邊一區呢？亦懷疑「新果東」選區係咪喺油麻地果欄附近。
同屬建仔嘅沙田區議員李世榮承認單張的確出錯，但只限沙田區所派單張。周浩鼎參選經理人之一、工聯會立法會議員鄧家彪就話，佢事前無睇過嗰批單張，對此深表遺憾，又話可能因臨近投票日趕製單張致有錯漏，盼選民見諒。立法會新界東補選候選人還包括新思維黃成智、本土民主前線梁天琦、公民黨楊岳橋、獨立方國珊、梁思豪及劉志成。
